Ach dia Menner - oder – Zwoierloi Maß!

„Mei Hals tuat weih ond au mei Kopf,
was ben i für an armer Tropf!“
So hairt mr jetzt dia Männer klaga:
„I ben so krank, kas neamer saga,
hol schnell da Dokter, der soll komma,
hairsch net, i ka jo bloss no bromma.
Fiaber hau i – mach mir Wickl
ond hol aus dr Apothek dia Mittel.
No machsch Tee,
s’ka au nex schada – ond a Süpple für mein Maga!
I ka au fascht nemme schnaufa –
ond mei Nas fangt a zom laufa!
Aber Du, Du glaubsch mirs net,
daß i todkrank lieg em Bett......!“
Ond so goht des acht Tag fort,
s’isch für d’Männer grad an Sport
d’Ehefraua rom zom jaga
ond dobei no ständig z’klaga!
Wenn des omghairt wär – auwaia
do könntet mir Fraua os aber fraia:
„Dua net so – s’isch net so schlemm,
wega so ra bißle kratziger Stemm –
so guat wia Ihr Hausfraua hen mir des net,
daß mir ons neileget glei ens Bett!“
Dui guate Pfleg isch längst vergessa –
so wird halt älles mit zwoierloi Maß gmessa!