Promis - oder - wen juckts?

Wen juckts - ob d'Queen Elisabeth
geizig isch - oder au net?
Wen - wo - dr Boris duat vernascha,
weler Schauschpieler oft hascha?
Ob d'Steffi Graf verheirat ischt,
dr Prügelprinz wieder oin verdrischt?
Wo oser Kanzler Urlaub macht
oder d'Naddel schadafroh lacht?

Wr will schau wissa, wer - wann - was - mit wem,
en ra Abschtellkammer treibt ond ob's bequem?
Wer sauft ond bscheißt - goht nebanaus
oder kauft en Florida a Haus?
Wer schwul isch oder hetero,
worom d'Fürschtin Gloria goht en an Zoo?
Ob dr Stefan Mross selber trompeta duat
on d'Hannelorer Elsner hot an nuia Huat?

Des ließt mer überall zo älle Schtonda -
was net wohr isch - wurd erfonda.......!
Domit miaßt dia Promis leba
oder a Verleumdongsklage a'schtreba.
So wett i net leba - dia hen ja nia ihr Ruah,
emmer ond überall guckt ebber zua!
Des woaß i g'wiß - ond sag es Dir:
"Dia scheißet au net wärmer - als wia mir!"