"Dätsch mr" oder "Dua mr"?

Mei Nochber isch en Rente komma,
hot beim Daimler tränareich Abschied g'nomma.
Er hot sich's schö g'macht mit sei'nra Frau
ond fünf ond sieba grad sei lau.

Ansonschten hot "Sui" dr hoam d'Befehlsgewalt g'het
ond "Ihn" beschäftigt von früh bis schpät:
"Dätsch mr net zom Supermarkt laufa
ond Milch ond Brot ond Eier kaufa?

No lesch Deine Schuah besohla,
uf am Rückweg kasch glei Schprudel hola,
Gschirr abtrockna - d'Schränk abschtauba,
Rasa mäha - Teppich sauga!"

Bei seim Fraind hot er sich beschwert,
doch - der hot ihn glei belehrt:
"So sche wia Du - hau i des net,
do mach i de ällergröschte Wett!

Dei Frau sait "Dätsch mr net" - des isch a Frog,
mit dr meinra hau i a andera Plog:
dui macht aus ihrer Emmanzipazio koan Hehl,
dui sait: "Dua mr" - des isch a "B e f e h l "!