Computerprobleme

Mei Computer duet et emmer was i will,
bleibt manchmol noch am Eischalta oafach still.
Ond weil i halt et dr Boris Becker ben,
hilft mir au nex mit:"Ben i schau dren?"

D'Telekom sait - d'Verbendong sei g'stört
ond so bleibt mir oafach s'WWW verwehrt.
I mach Bitte Bitte - I schempf ond fluach,
mach zom xsta Mol an nuia Versuach.

Jetzt isch's ganga - s'lauft wia gschmiert,
geb's Passwort ei - er hot's "akzeptiert!"
Plötzlich - ach - o Schreck - o Graus,
fall i wieder aus am Internet raus.
Ond weil mer net oft gnueg üaba ka,
fangt mer halt nomol vo vorna a.

Jetzt isch ganga - schnell E-Mails abruafa
ond über onütza Werbong fluacha;
Post beantworta - Rechnonga überweisa,
beim Surfa - en Gedanka verreisa......!

Heidanei - jetzt macht der Cursor Mucka,
ka no so oft uf dera Maus rom drucka.
Was isch denn blos los - sen d'Batterie leer?
No müaßet halt schnell a paar Nuie her!
So an Mischt - d'Eikaufszeit isch au schau rom,
no fahr i halt gschwend zur Tankstell nom.

D'Batterie sen dauscht - aber s'duet sich halt nex,
moan grad dr PC isch vom Harry Potter verhext!
G'nervt reib i d'Auga - ond no hau i s'gseah,
dr Stecker vom Glomp isch et sauber dren gwea!
Mir langts - i hau gnueg - schalt oafach aus
ond hoff - i träum heit Nacht et - vo ra heniga Maus!