Idealfigur

Zur Zeit wurd heftig diskutiert,
ob "Frau" ihre "Problemzona" operiert.
De Oane moanet - se sen z'dick,
de Andre - an größerer Busa wär ihr Glick.
Fett absauga - Schmollmund schpritza,
onter Folie d'Oraschahaut wegschwitza,
Busa schtraffa - Falta lifta,
biologisch ernährt - "vergifta".
Wer sich s'leischta ka goht vier Wocha uf d' "Runzelränsch",
kommt bettelarm zurück - als neuer Mesch!

Bloß - wer - diktiert - was isch "ideal",
"guat gebaut" - oder - "Hongerhoka schmal"?
Wia ka sich denn "oa Ma" getraua
so z'urteila über os Fraua?
Seid doch objektiv - ond gucket Euch om,
wia laufet denn de meischte Menner rom?
- Mit dicke Bäuch ond kromme Fiaß,
em G'sichta o'gepflegtes Gmiaß,
ausbeulte Hosa - d'Absätz kromm gloffa,
einige au sternhagel bsoffa!

Mancher - jetzt no "jonge dynamische Ma"
setzt irgendwann au - an Rettungsring a,
kommt en d'Mitleifkreisis ond somit en d'Johr,
kriegt selber Falta wird grau ond verliert seine Hoor!
Duat "Er" dann sei Huld - 'ra "Jonga, hübscha" schenka,
domit - da Blick - bloß vo sich selber ablenka!
Em Grond gnomma - nemmt au sei Kraft a mol ab,
wurd miad ond grätig - ond em Bett schlapp!
No könnt mer "Ihn" en d'Wüschte schicka,
denn sei "nackte Wahrheit" duet au neamer mei entzücka!

Liabe "Mitfraua" - i geb Euch oan Rot:
"Schtandet zo Euch selber - sonscht isch älles z'schpot!"
I brauch koan Ma - der mir s'Idealbild diktiert,
s'hot lang braucht, aber i - für mi - hau's kapiert.
I hau koa Angscht vor meim Schpiegelbild,
werd net bei jedam Fältle wild,
i schtand zo meine graue Hoor,
verschweig au net meine Lebensjohr.
Sag mir - wia i be - so isch richtig,
wer anderscht dekt -der isch net wichtig!