Übersättigt

Fascht täglich - mittags - so ab Zwei
gibts Querbeet em Fernseha - Richterei !
Beim RTL tagt s' - Strafgericht,
verdonnert fascht jeden Bösewicht!
No kommt der Richter - Engeland -
nemmt familiäre Schwierigkeita en sei Hand!
Ab Viere führt - Ruth Herz - wohlüberlegt.
Jugendliche z'rück uf da grade Weg!

SAT 1 schickt mit verschdändnisvollam Gsicht
- Barbara Salesch - ens Gericht!
Vom Knallerbsastrauch bis zom Drogedelikt
wurd freigschbrocha oder ens Gfengnis gschickt!
Am Viere kommt zo gueter Letzt,
em Vorschpann dr - Alexander Hold - d'Schtiega ruf gwetzt!
Er isch eigentlich a giatiger Ma,
der aber drotzdem schtreng sei ka!

A'schließend, daß isch et so einerlei,
kommet die Seria mit dr Bolizei!
- Niedrig ond Kuhnt - zeiget was se kennet,
wia se ermittlet ond d'Täter feschtnemmet.
No berichtet - Ingo Lenßen - mit seim Zwirbelbart,
daß s'Leba als Privatdetektiv isch manchmol hart!
- K11, Kommissare im Einsatz - zeiget aus ihrer Sicht,
wia schwierig d'Ärbet bei Ermittlonga ischt!

S' ZDF isch uf dean Bolizei-Seriazug au ufgschbronga,
hot - Einsatz täglich - en s' Programm uf gnomma!
- Soko - ond - Ein Fall für zwei -
send do wöchentlich au dr bei.
Zur Zeit vom g'miatlicha Obedessa,
derf mer - Derrick - ond - Der Alte - et vergessa!
- Siska - ond - Rosa Roth - send au zor Schtell,
dui - Bella Block - fangt d'Täter bsonders schnell.

Bei dr ARD lauft s' - Großstadtrevier -
do drzua trenk i a Gläsle Bier.
- Adelheid und ihre Mörder - guck i ganz gern a,
dui zeigt ihrm Scheff, daß au a Sekretärin ermittla ka!
Beim - Polizeiruf 110 -
mach i mir's uf am Sofa bequem!
- Die Kommissarin - isch a taffe Frau,
nemmt jeda Fall besonders g'nau!

Am Sonntig Obed miaßt mer bald ens Bett,
wenn mer et da - Tatort - hätt!
Eigentlich hau i an Krimis ond Ähnlichem mein Schbass,
aber doch net pausalos - ohne Onderlass!
Hot oa Sender rausg'fonda - was de Zuaschauer g'fällt,
wurd bei de Andere glei au s' Programm omgschdellt!
Fällt deane Fernsehmacher nex nuis mei ei?
A bißle Abwechslong wär halt fei!