'S Busserl unterm Rosnschdrauch

'S Busserl unterm Rosnschdrauch

(aus de Häglwerther Säsoneddl 2010)


Und heier iwerdachd a Rosnschdrauch
de Dichterlaum in seiner scheenstn Bliah.
Der Weg nei, voller Bladl, kimmd mer fier
wia bschdrahd noch am antiken Hochzadsbrauch.

I griag a säitsams Andachtsgfui im Bauch,
wia i auf Rosn nei ind Laum marschier:
ois waar's a oider Templ irgendwia,
a Heiligtum, in dees i einedauch.

Und wart ned aa jäds Johr auf mi do drin
a Braud, de mir aufs Hirn a Busserl druckd,
a Muserl, des mi inschbirierd zum Dichtn?

Iatz song gwieß wieder manche, daß i schbinn,
naiv bin, abergleibisch, ja verruckt ... -
I mächd koa Johr aufs Busserl mehr verzichtn.