Vorsichd, bissig!

Vorsichd, bissig!

(aus de Häglwerther Säsoneddl)


Gebisch und Dickichd gibds am Ufer ja
grod gnua. Do konn a Breiß se drin verschdecka -
wia neilich oaner - der's hoid ums Verrecka
beim Boon im Urlaub brauchd, sei Effkaka.

Er soiert liawer doch vialeicht sei A
und O verhuin - ned zwengs'm Leidderschrecka
und "Öffndliches-Ergernis-Erwecka",
legd freindlich eahm a Einheimische nah,

de gseng hod, wiarer grod in'n Sä neimächd.
(Durchd Schdreicher durche hod'n dee derschbechd:
Wos's inddressierd, seng d' Weiwerleid ned schlechd!)

"ZiangS liawer doch a Badehosn o!
De Fisch im Sä, song d' Angler, guader Mo,
de beißn aa beim gleanstn Wirmerl scho!"