Schee gifdig (Baddermahliawado!)

Schee gifdig
(Baddermahliawado!)

(aus de Häglwerther Säsoneddl)


Ja, mahdderBaddernia im Greiddergartn?
Des Greazeig schiaßd ind Häh grod wia ned gscheid
und bliahd so gscheckerd, daß's a wahre Freid
zum Oschaun sann, de Greidder oller Artn.

Doch deisch di ned! Oft sann agratt de zartn,
verfiarerischstn Bleamerl bsonders gfeid
und gifdig - wia de Dirndl bei de Leid:
do sann dann aa de Manner oft de Gnarrtn.

Am gscheidern waar's wahrscheinlich fier an Mo,
er lasserd seine Finger ganz davo.
I moa: an Greidderschnaps, den derfer dringa,
do feid se nix. Bloß: bei de junga Dinger ...

Oa Badder ko a Liadl davo singa:
Sei Graud war ned des Gifd fiern Romeo ...