Am Wasser baud

Am Wasser baud

(aus de Häglwerther Säsoneddl)


Ois Schwan häd i damid gor koa Broblem.
Do daad si koaner driwer lustig macha.
A Schwananest am Ufer hoid - und nacha?
Ma woaß, daß Schwana newam Wasser leem.

Und aa ois reicher Mo: do häd i eem
am Sä a Willa, lasserts dortn kracha
und neamand fanddert dro an Grund zum Lacha.
Ma lachd ned iwer Reiche außerdem.

Nochdem i aber weder gäidig bin
und aa erschd rechd koa Schwan, hod oiß koan Sinn:
Soboid i a Gedichtl les, a riarerds,
vor Freind - und i ko no so doa, ois gschbiererts
i gor ned - merkanses und lachan laud.

I hob hoid einfach nah am Wasser baud.