A Säblockadn

A Säblockadn

(aus de Häglwerther Säsoneddl)


Gibt's iatz dees aa? Aufd Seitn, freche Bande!
Ja, Herrschaft! Laßts mi gfälligst do vorbei! -
De riern si ned! De geem den Weg ned frei!
Ois daadns mid mir Reiwer schbuin und Schande ...

Wos dua i iatz? Ois Konrad Lorenz fande
vialeicht ans Land ... A so a Viecherei!
Gwieß sann de Oidn zwengs de Junga drei
so rabiat. Ja direkt bissig sann de!

D' Leid lachan scho! - Ja, häifts mer hoid, ihr Deppn,
und scheichts de Bande weg do von der Dreppn,
damid i endlich außeko! Mi friad's!

I kimm ned hi! Des Schwanagschwerl blockierd's!
Muaß i bis drüm zum andern Ausschdieg schwimma ...
Eich fuaderd i fei meiner Lebdog nimmer!